مزاااج الخير
بتشرب سجاير .. لأ
طب بتضرب بورشام.. ياعم لأ
يبقي أكيييد بتشرب حشيش .. الله ما قلنا لأ
فأخرج لي حباية م الاحمر وأخري "كوك" ثم قال بكل بجاحة وكأنه يعرفني من زمان أوي: طب اضرب دي يا كبييير .. ياعم وحياة ربنا ما باضرب زفت.. يتوب علينا ربنا
ففاض بي وكاد أن يقل لي يا عم فكك مني يا عم انت وانزل شوف لك ركوبة تانية قفلت لنا أم الدماغ اللي كنا ناوييين نعملها في ام اليوم اللي جبت أخره ده ع المسا"ولكنه لم ينبس ببنت شفه أو مرات جلدها" .. هكذا بدون مقدمات بدأ الحديث معي وكأنه يعرفني من زمان أوي أو يعرف خالتي عيوشة سامحها الله هي اللي بتعرف سكك العالم دي وكانت شغاله ديلر في عز شبابها!!
أبو فارس .. هكذا هو متزوج صغيرا علي 17 سنة يبلغ من العمر 30 عاما ويقطن بإمبابة .. جمهورية الكيف في المحروسة.. ويشرب الحشيش والبانجو منذ خشونة أظافره ورثها نفساً وشداً أبا عن جد ويعمل سائقاً منذ صغره أيضا ولم يكمل تعليمه وخرج من الاعدادية ليبيع المخدرات.. رفض أن يركب راكب ثاني بجواري في الميكروباص فأخرج لفة الحشيش من تابلوه السيارة وقبل أن يشعلها قال لي :
علي فكرة السيجارة دي ملفوفة من امبارح ومكسوف اشربها من الصبح قدام الزباين بس خلاص أنا تعبت فأخرج الولاعه من جيبه اليمين ثم أشعلها فيها وسحب منها نفسين حتي تشتعل وهو يتمني لو أحكم اغلاق أبواب السيارة حتي لا يطير منها الدخان لولا كسوفه من الزباين سامحهم الله.
فقلت له : مكسوف م الزباين ولا خايف منهم يا أسطي
فقال لي: أخاف من مين يا عمنا أنا مابخافش الا من اللي خلقني وخلقك.
*طب ايه
**أنا بس عامل حساب انهم ممكن ياخدوا عني فكرة غلط ولا حاجة
*انت خايف من نظرة الناس ومش خايف من نظر ربنا عليك وانت بتشرب حاجة حرمها !
**بس ربنا حرم كل مُسكٍر والحشيش بيعمل دماغ بس ما بيضيعش العقل بالعكس دا بيعلي الدماغ يا رياسة
*دا مبرر بنخترعه ونجهزه دايما عشان نداري بيه غلطنا مع ربنا ونريح بيه ضمايرنا اللي لو نطقت هتلعننا مع كل نفس !
**طب اعمل ايه اذا كنت اتولدت لقيتهم بيرضعوني الزفت الحشيش ده في البزازه مع لبن الام !
*يعني وصلت للادمان يا مان!!
**وحياتك للي بعد الادمان من زمان أنا ما اعرفش انام الا لما اضرب سيجارة أو اخد بورشامه !
*هنا كان لابد من عمل فلاش باك سريع لذاكرة أبو فارس حتي افهم تلك الشخصية العجيبة الغريبة المريبة، فسألته انت بتشرب حشيش من امتي يا كبير ؟
**من وأنا عندي 8 سنين أصل أبويا كان بيتاجر فيه فكنت باشرب ببلاش وبراحتي
*يعني اشتغلت معاه
**وكنا بنكسب دهب وبنعمل ييجي 12 ألف جنيه .. فسألته: في الشهر
**لا طبعا في اليوم الواحد دا في الميت خالص لما نقول اننا ما وزعناش بس النهاردة الكيس بقي غالي أوي تخيل وصل سعره ل2500 جنيه بعد ما كان ب500 جنيه قبل الثورة .
*للدرجة دي
**ياباشا الحشيش في امبابة النسوان بتبيعه في الاكشاك زي اللبان والشباب بيوزعوه في التكاتك زي سيجارة سوبر او كيس لب .
*ومش خايفين يتحبسوا ؟
**انت طيب أوي يا عمنا انت عايز تفهمني ان الحكومة مش عارفة كل المسجلين خطر والبرشامجية والمدمنين والحشاشين .. دا انت غلبان أوي الحكومة عارفة كل واحد من دول بس سايباهم بمزاجها وساعات بتنصص معاهم .
*قصدك انهم بيغيبوا بالحاجات دي الناس عشان ما تعملش ثورة تاني ضدهم زي 25 يناير ؟
**بالضبط أديك فهمت التيتة وجبت الزتونه يا رياسة انت كده بن كار بصحيح
*بس الكيف دا نهايتة وحشة يا اسطي؟
**بص أحنا مش هنروح بعيييد .. اخوات مراتي كلهم مسجلين وبرشامجية وعم مراتي تاجر حشيش اتمسك واتحكم عليه تأبيدة بسبب الزفت الحشيش ده وبعد ما قضي ال25 سنة في السجن وكان باقي له 3 اسابيع فتحوا عليه الزنزانة لقوه ميت وفي ايده سيجارة حشيش يعني ضيع مستقبل ولاده ودفن نفسه بدري وكمان خسر أخرته بعد ما ضيع دنيته !
*وهي هتفرق كتييير اذا كان عايش ميت وكان مدفون بالحيا.. يمكن ربنا بكده يكون رحمه !
*طب ممكن اسألك سؤال؟
**اتفضل
*ايه ذنب فارس انه أبوه يطلع مدمن حشيش أو مخدرات ؟
**أأقولك حاجة أنا مرات أخويا بقت بتتصل بيا كل شوية وتقولي حلمت انك حصلك حاجة .. بتخاف عليا أكتر من نفسها بس بجد أكتر واحد خايف عليه هو ابني يمكن ربنا يهديني عشانه هو مش عشاني أنا !
*وليه مش عشانك انت ليه بتبخل علي نفسك بالهداية وانك تبطل الطريق ده عشان خاطر صحتك اللي ربنا بيبعت لك اشارات انها بتضيييع الحق نفسك وانت ولا انت هنا ؟
**ولا كأني باتكلم معاه أخذ ينفث الدخان في الشباك المفتوح علي مصراعيه بجواره من أخر بقايا سيجارة الحشيش التي كادت أن تذوب بين يديه لتدمنها هي الثانية اقترب مني ثم كاد أن يهمس في أذني قائلا: ممكن اسألك سؤال؟
*اكيييد يا ريس اتفضل ..
**انت لو اتولدت لقيت نفسك علي ملة تانية غير دينك اللي هو الاسلام هتأسلم ولا هتكمل علي دين أبوك وأمك؟
*اكيييد طبعا علي دين أمي وأبويا بس النبي صلي الله عليه وسلم بيقول لنا "كل مولود يولود علي الفطرة فأبواه هما الذان يهودانه أو ينصرانه أو يمجسانه".
**وأنا اتولدت وفي بؤي سيجارة حشيش.. أدمن ولا أسلم !
فقلت له علي الأقل : اسأل فطرتك اللي اتلوثت بالحشيش والبانجو والبورشام .
*ولم يشأ القدر أن يكتمل الحديث مع أبي فارس فجاءت محطة النزول وقبل أن افتح باب السيارة قال لي ادعي لي ربنا يتوب علينا من البلاء ده يا استااااذ
** فنظرت اليه وعلامات الشخوخة تقترب من وجهه وقلت له ربنا يتوب عليك يا ريس بس نصيحة ابقي بص لنفسك في المراية لما تروح النهاردة .. علي فكرة اللي يشوفك يديلك 50 سنة مش 30 زي ما قلت لي !
والي لقاء تاني يا ابو فارس بس من غير حشيش
ليست هناك تعليقات:
إرسال تعليق