لا انا يسارى ولا انا اخوان
ولا فلولي أو حتي عميل للامريكان
انا م اللى شافوا الويل عشان صبحك يبان
انا اصلى مصرى ومصري أصلي وشاب عادى لكن بحب الطين وشجر السيسبان
انا كنت ع الزراعيه بالعب فوق ترابك شايل كتابك فى الضلوع يا ام الزمان
بحلم ببكره فوق شفايفك يترسم وبابتسم يامصر يا سحر المكان
يافاتحه للاشواق ببان العشق
يارشقه مابين الضلوع فى القلب رشق
ياصولجان الشوق وميزان الميزان
يابنت نيلك عايز اجيلك بس حايشنى جبان
فاتح سجونك للى عاشقين التراب
فاتح بيبانك للحرايق والخراب
فاتح في قلبه سرداب مليان سراب
خايف تكونى منوره عايزك تكونى مقبره.. أقول كمان
قفل الميدان اللى نسجنا فيه نهارك
واسرق قرارك زى ألعن أولعبان
فرق ولادك وكل همه انه يكسرلك عنادك
عايزك تعيشى الخوف وتحترمى الهوان
راجعين وشايلين البشاير يا وطن
وبروح يناير فى المكان وفى الزمان جايين
نعيدك للغلابه من بين مخالب البوم وانياب الديابه وفجرك يبان لناس تانيين
وبرغم كل شئ وبرغم سواد الليل مكملين #ربيعياتي_في_طي_الزمان
ليست هناك تعليقات:
إرسال تعليق