ولا عزاء لدولة "المؤسسات" الخيالية أو ثورات الـ"خريف عربي"

أنت ربيعي يا مصر

بحب أرضي.. يعني بحب بلدي.. يعني بحب مصر.. يعني خالتي عيوشة دائما كان نفسها ببيت بعمارة تلمها وتتدفي وتحتمي بيها من غدر الزمان وأهل الزمان وأبويا عمره ما كان يقبل بيت برا مصر وأمي طول عمرها لو خرجت من بيتها وطنها اللي سكن جواها قبل ما تسكن فيه تموت وتحس انها مخنوقة.. بحب أرضي.. يعني اللي عايشين ببيت بيغرق مع المطر وما بيبدلوه بـ ولا مليون بيت تاني.. بحب أرضي.. يعني عادي أجوع و أفقر وأعيش ع الكفاف طول عمري ولا أرضي تضل أرضي.. بحبك يا بلدي ومش هاقبل إنهم يسرقوك ويبعوك لسماسرة الأوطان لأنك ربيعي أنا يا مصر

بين العشق والهوي

للعشق ألف مدينة وللهوي ألف باب
ولوجهها المندس في قلبي كعصفور
تقاطيع الوطن.. 

مرت من العينين منذ دقيقة
تركت علي الجفنين بعض حنينها
فتخضبت كفايّ وارتعش البدن
بيني وبين الحلم قدر رصاصة
قالوا بأنك قُتلت من الهوي
قلت بأني قتيلك عاشقي
فـ منحتني حياة مابعدها حياة
فإذا صحوت فأنت أول خاطري
وإذا غفا جفني فأنت الآخر

نفسي أعيش جوا روحي

من كام سنه كده

مش فاكر كام

تقريبا فترة " إعدادى "

انا كنت بنام بالليل عادى

مش خايف انى أموت مـ الجوع

مش شايل غير هم الواجب

والإمتحانات ..

والبنت اللى فـ درس العربى

وبشوفها يومين فـ الاسبوع

تقريبا برضه " إتنين وتلات "

والواد سومعه

علشان صاحبي

وبنلعب كوره فـ نفس التيم

والواد مايكل

علشان كان صاحبي الأنتيم ..

على كام أغنيه وفيلم قديم

على حبة خوف

من نطة سور

على حب سنين

إتنسى فـ شهور

وكأنه مراهقة ومكنش حقيقي

وأهو كله إتفرق عن كله

وبقيت فـ مكان ..

والناس فـ مكان

ومابينا بعاد وحدود وبلاد

ولا عدت بشو ف سومعه

حتى

وأهو مايكل يمكن أحيانا

يبعتلى رسايل فـ الأعياد

والبنت خلاص جالها نصيبها

وإتخطبت قبل مأخلص جيش

وصحاب تانين سافروا لبره

علشان القرش وأكل العيش ..

وانا لسه باعافر واسعي علي حب جديد

وعلي حلم العمر اللي سهرت عشانه ليل نهار

ولقيتني بانحت في الصخر وجنبي حب مصحيني

حب مدفيني وموريني سعادة الكون

وخلاني ازغرط م الفرحة من قلب حبيب

علشان في قلب بيتعلق بحياتي وروحي

ويقرب مني وبينسيني آلامي وجروحي

نفسي ارجع تاني لايام زمان

واعيش مش خايف من بكرة

ولا من امبارح وانسي الاحزان

واضمك بين احضاني وانام

واغمض قلبي بايديك

وادفي رموشي بعنيك

والف كل الكون بيك

عشانك حبيبتي

مش هاكون غير ليك

عشانك حبيبتي

هاكون ليك

يا أرضي يا غالية

يا ست الكون

سواق سرفيس أخر غتاتة

من شوية ركبت مع سواق سيرفيس من كوبري الخشب لميدان لبنان.. وياريتني ما ركبت معاه أو شفت وشه من الأساس، العربية كانت مهكعه وعفي عليها الزمن وهربت من ثورة 52 بكفالة والسواق كمان مبالغ فيه..فعلا المخاريب علي سائقيها تركن.. اللي حصل اني فتحت الكتاب اللي معايا وقعدت اقرا فيه كعادتي وإذ فجأتن فرقة حسب الله اشتغلت أول ما السواق ركب المخروبة المهم اني استأذنته بكل وداعه وطيبة السنيييين.. وقلت له وطي الصوت شوية لو سمحت أنا مش عارف اركز.. لقيته استجاب بس بالعكس .. أتاريه بيعليه أكتر م الاول .. قلت له انت عليته يا ذوق مش وطيته .. قال لي والله السماعات دا أوطي حاجة فيها .. عملت نفسي من بنها وقلت خليني احاول انعزل عن الدوشة والضجيج اللي حواليا واعيش في جو الرواية الصعيدية الممتعه.. شوية ولقيت الصوت أعلي .. ممكن تطفي الكاسيت يا أسطي معايا مكالمة واحتمال تطول شوية : الصوت جاء من خلفي مباشرة فحمدت ربي ان الناس لسه عندها ارادة للتغيير.. فاستجاب الأسطي هداه الله لنداء الشيخ العجوز الذي أكل الدهر عليه وشرب كاسات مرممطة وشقي وبؤس.. ومال علي أذني وهمس الي مداعبا والنبي دا جو تقرا فيه لا النور النيون ولا الدوشة دي تسمح لك بإهانة قدسية كتاب جمييل زي اللي في ايدك.. قلت له : يا ابويا ياما دقت ع الروس طبول لازم اتعايش واكيف نفسي مع أي وضع وتحت أي ظرف.. قال لي ربنا يعينك بس انت دماغك نضيفة انك بتقرا لكاتب زي المنسي قنديل.. أثنيت عليه وشكرته علي إطراءه اللطيف وملت قليلا الي صاحبي اللي بالخلف راجيا غياه ألا يفرغ من مكالنته ولو من باب التظاهر حتي نصل إلي الميدان في هدوء ثم تابعت القراءة .. وما هي الا لحظات من السكون العام حولي حتي فوجئت بكمين ينغص عليً قراءتي ويقطعها للأبد .. أوقف السائق وسحب منه رخصته لأن نمرة المخروبة غير ظاهرة وعلي راي المثل "قليل البخت يلاقي العظم في الكرشه" فركنها في جانب الطريق ثم توجه الي ضابط المرور وحاول استرضاءه وغمزه بعشين جنيه ولكن محاولاته باءت بالفشل .. فأتي الينا وحمدنا الله أن الموضوع خلص وهنمشي ولكن لم نكن نعلم أنه يريد ركن المخروبة في شارع جانبي ودون حتي كلمة استآذان اغلق بابها غاضبا وخرج اليه محاولا استرضاءه والتملل والتذلل اليه أحيانا حتي يرضي عنه ويرضيه.. فقال لي أحد الركاب الذين تناوبوا في النزول من قبلي : انت في مصر يا عمونا بلد الفوضي والعشوائية قلت له: تصدق كنت نسيت يا جدع

جربت تعيش

بتعيش ازاى؟
زى العايشين
بتحب الشاى؟
بالظبط تمام
زى النيكوتين
بتحب الناس؟
أوقات اوقات
زعلان على حد؟
أبويا اللى مات
جربت تموت؟
مش لما أعيش
جربت سكوت؟
من كتره هاموت
طب عايز ايه؟
عايز أكون
وايه اللي مانعك؟
خفافيش الكون
يعني حاولت؟
أكيد وفشلت
طب جرب تاني؟
الفشل قدامي
خلاص يئست؟
عمري ما بطلت
جرب تاني؟
حاولت
طيب ووصلت؟
لسه ما كملت
أكييد قربت؟
عمري ما بعدت
طب ايه بقي؟
الخوف خلاني
نسيت أحلامي
يعني سلمت واستسلمت؟
عمر ما كان في وجداني

أنــا قلبى ملّ 
م الأنتظــار

تبات نار تصبح رماد..
بنبات فى نــار 
نصحى فى نـار
والعيش مرار

بلاش تشاؤم؟
عايشين فى ليل 
بنقول ندوّر عالنهار ..
ونهارنــا غاب 
والقلب من كُتر الغياب 
زهقان ومل
طيب روحت لطبيب؟
قلت له لازم تشوفلى حل
قالى دواك هو
الأمل 
واياك تِمل ..

يعني ايه قررت؟
الحلم كان عنواني
بس الواقع صحاني
وهويت من تاني
قلت لنفسي اثبتي وقومي
حلمك بيحلم بيك يا أناني
سألت نفسي انا ايه

أنا مين وازاي وليه؟
لحد ما فؤت خلاص
وقوم ايه ألف وأرجع تاني
ومرة والتانية والتالتة
الاقي ذاتي وكياني
واوصل أخيرا لعنواني
هي الحياة ايه غير
لف وارجع تاني
#جربت_تعيش
من ديوان #لف_وارجع_تاني